Re Ricard in Friûl

Ǧuanluche Franco

Re Ricard in Friûl

Da lis strichis cul Saladìn
a lis sgrifis dal cont di Gurize

(C) 2012 Clape Culturâl Aquilee (2ed)

Il romanç

Al è un fat di veretât che il re inglês Ricart Cûr di Lion al à scjavaçât fûr par fûr il Friûl par tornâ tal so Paîs, daspò finide malementri la Tierce Crosade.

Ricard Cûr di LionNus al contin storics e scritôrs forescj e un cetancj dai nestris, ma ducj cence palesâ trops detais in plui dal fat nût e crût: pôc e nuie sul sît dal litorâl adriatic che Ricart al à metût pît a rive in Friûl; nuie su trops dîs ch'al à scugnût fermâsi chenti; nuie dibot sul trop di crosâts che si menave daûrsi par frontâ i pericui ch'al varès incuintrât zirant par mieze Europe prin di rivâ te sô isule; nuie su cui che lu compagnave te traviersade des tieris dal Patriarcje di Aquilee che in chê volte al «regnave» in Friûl e che di sigûr al podeve judâ o contrastâ il so passaç.

I pelegrins ch'a tornavin di Tiere Sante, massime chei ch'a vevin stât a bati tes crosadis, a gjoldevin in dute Europe di un tratament speciâl, une sorte di ausvais diplomatic, figurâsi un re crosât! E massime chel re che la sô famee, chê dai d’Angjù, a veve un cont viert cu la Glesie.

Di fat il pari di Ricart, Indrì II, al veve fat sassinâ Tomâs Becket, il vescul primât de Glesie di Anglie. Il fat al jere stât sucedût dal 1170 cuant che Ricart al veve nome che tredis agns e ancje s’al jere pôc plui di un frut, chel malfat di so pari no s’al jere dal sigûr dismenteât.

E no jerin passâts trê agns che il Pape Lissandri III al veve beatificât il martar inglês. E la sô devozion si jere slargjade intun amen in dute la Europe e e jere rivade daurman ancje in Friûl, tant al è vêr che te basiliche di Aquilee za tal 1180 il patriarcje al veve benedît un altâr di marmul cu la figure dal gnûf sant dongje di Sant Pieri e dal Crist.

San tomâs Beckett

La storie di Ricart in Friûl in ogni câs e je in chescj pôcs fats ancje se significatîfs. Ma no la nestre storie. O vin lavorât di fantasie, che ben s’intint, ma cence mai tradî chê ch’a àn scrit i storics di profession.