---

Introduzion

Napoleon, imperadôr dai Francês, al jere alt un metri e sessantenûf centesims, almancul cinc centesims plui di chê ch’e jere la mezarie dai oms tai siei timps. E plui di Horatio Nelson, ch’al jere alt un metri e sessantedoi centesims.

Nol sarà stât grant ma nol jere dal sigûr piçul. Pûr sal à simpri ricuardât cussì, vadì colpe i anglês, ch’a volevin disgradâ i siei merits militârs, o salacor par vie de Vuardie Imperiâl, che lu cercenave simpri e ch’e jere, par volontât dal stes imperadôr, metude adun dome di piertiis di oms.

Tant e tant a son putrops i oms e lis feminis, in ogni timp, che ur al è restât impeolât intor dome che un fat o cualchi opare de lôr vite, che ur è restade une brute innomine dome par vie di cualchi slengaçade o, al contrari, ch’a son preseâts in gracie di cualchi laut magari no dal dut ben fondât.

E denant dal tribunâl mugnestri o dispietât dal timp, il scritôr nol pues che jessi un avocat di difese, ch’al à di lâ a sgarfâ là che pôcs di lôr a son za lâts a cirî e no intignîsi sun chel che i plui a àn za fat parie sentenzie.

Cheste racuelte di contis e cjape dentri dodis personaçs furlans ch’a àn, ce plui ce mancul, une brute innomine. Par ognidun di lôr si à volût palesâ un aspiet mancul cognossût, un fat restât platât, un savoltament di cualchi veretât intindude, une fantasie pussibil, ch’e podès judâ a cognossilu miôr.

No si à volût fâ buinis azions che no si pues scusâ, dreçâ tuarts ch’a son stâts plui o mancul patîts, gjavâ colpis che no si pues mondâ o che si viôt a clâr che no sussistin.

Si à vût dome chê di presentâ, denant di une jurie là che no si vinç mai, un plaidart, une perorazion, une domande di boncûr, come che cualsisei avocat di causis pierdudis al è peât a fâ.

---

Tabele

 Il vanzeli di San Marc

Nicolau dal Lussemburc (1321-1358)

 Une crigne di vergogne

Ricart V. (1918-1989)

 Chest tal volevi dî

Toni Zanella (1887-1955)

 Il surtum da l’anime

Tristan di Savorgnan (1377-1440)

 L’ombrene di un supiç

Francesc M. (1968-1976)

 Une sfese tai dincj denant

Romilde dal Friûl (574-610)

 I pes de Mont Cjanine

Laurinç Luis Linussio (1772-1852)

 La rassegnazion di un assedi

Bassile di Aquilee (208-237)

 La code dai todescs

Zuan Padoan (1909-2007)

 Die lunae 3 ottobris 1580

Pauli Gasaprut (1550-1594)

 Ritrat di famee

Biatriç dal G. (1832-1896)

 Il mian e la catapulte

'Sef dai Sus (1701-1764)