---

Presentazion

Al è un fat di veretât che il re inglês Ricard Cûr di Lion al à scjavaçât fûr par fûr il Friûl par tornâ tal so Paîs, daspò finide malementri la Tierce Crosade, la «Crosade dai Trê Rês».

Culì il cont di Gurize Mainard lu scorsenà fin che al rivà adore di dâi la gafe e di menâlu in cjadenis te Gjermanie.

Par vêlu indaûr, tal ultin, la Anglie e scugnì paiâ un riscat cussì grant che dute la sô economie e sdramassà.

I pôcs fats nûts e crûts, adun cun lis flabis sfloridis ator di chest câs, a son la fonde dal romanç storic in furlan «Re Ricard in Friûl» di Gianluca Franco. La storie e côr di Jerusalem fin Aquilee, di Cjarlins fin Gurize, de Aquitanie fin Cividât, framieç di boscs, mârs e lagunis. Une schirie di personaçs si dan la volte: Ricard Cûr di Lion e i siei Crosâts; il patriarcje Gotfrêd e i conts di Gurize Mainard e Enghelbert; pescjadôrs, cossans e cramars; cjalderârs, vuardiis e soldâts; marinârs, ostîrs e fiis magaldis; fruts, ladrons, damis misteriosis e un vescul; fin che un biel strani tradiment al siere la liende di Re Ricard in Friûl sul scurî di une dì dal mês di Tomuç dal 1192.

La «Cantata in re minôr par vôs e orchestre» e je la conte in musiche di cheste storie.

---

Scjalute